Mae cyd-destun y cynllun hwn yn eithriadol o heriol. Mae’r angen i ymateb i’r argyfyngau hinsawdd a bioamrywiaeth eisoes yn fater brys..
Mae’r cyd-destun economaidd byd-eang yn golygu bod angen i Barciau Cenedlaethol weithio’n galetach fyth i ddod o hyd i atebion teg ac i wneud yn siŵr bod y lleoedd arbennig hyn yn hygyrch i bawb ac yn fannau sy’n cynnig lloches, cyfleusterau cymunedol, ac adferiad. Fel sefydliad arweiniol y Parc Cenedlaethol, mae’n rhaid i ni fynd i’r afael â’r goblygiadau dirfodol a ddaw yn sgil y posibilrwydd o oddiweddyd y trothwy cynhesu o 1.5 gradd, a dychmygu dyfodol newydd ochr yn ochr â chynllunio ar gyfer y goblygiadau ymarferol i’n ffordd o fyw.
Mae’r dirwedd hon yn fyw, yn arbennig ac yn unigryw, a thrwy stiwardio’r 520 milltir sgwâr sy’n ffurfio’r Parc Cenedlaethol, gallwn, fel darn bach ond pwysig o’r jig-so, weithredu fel esiampl a fydd yn ysbrydoli ac yn galluogi eraill yn y dasg o ddiogelu ein cartref – sef y Ddaear. Bydd y Cynllun hwn yn ein harwain ni i gyd am y pum mlynedd nesaf o leiaf. Mae’n hollbwysig felly bod ei amcanion yn ein llywio’n ôl i fodolaeth sydd mewn cydbwysedd ag adnoddau prin y Ddaear. Dyna pam bod y Cynllun yn ddigywilydd o uchelgeisiol. Mae ein hymateb yn cael ei reoli gan dystiolaeth sy’n bloeddio fod y system yn dymchwel ac mae’r floedd yn rhy fyddarol i’w hanwybyddu.
Mae fy mhrofiad ers dod i’r Parc Cenedlaethol yn 2021 wedi tanlinellu fy mhenderfyniad i wireddu fy ngweledigaeth ar gyfer Parc sy’n enghraifft fywiog o gynaliadwyedd. Parc sy’n wydn o ran yr amgylchedd, yn economaidd lewyrchus, yn croesawu newid, yn agored ac yn groesawgar i bawb sy’n ceisio cysylltu â natur, harddwch ac antur. Gwn nad fi yw’r unig un sy’n meddu ar y weledigaeth hon. Rwy’i wedi cwrdd, siarad ac ymweld â llawer o unigolion a sefydliadau ysbrydoledig, ac mae nifer ohonynt yn rhan o’r cynllun hwn fel ein Sêr y Bannau. Ar yr adeg hon yn ein hanes, mae ein partneriaid wedi amlygu i mi, trwy eu gweithredoedd, y brys a’r angen am y Cynllun hwn, fel ein bod yn gyrru’r neges bod angen cynnwys cynaliadwyedd ym mhopeth a wnawn, ar gyfer cenedlaethau’r presennol a’r dyfodol. Rwyf hefyd yn benderfynol bod y cynllun hwn yn helpu unigolion a sefydliadau i gysylltu â difrifwch y problemau yr ydym yn eu hwynebu.
Buon ni’n ffodus iawn i weithio gydag artistiaid lleol talentog, sydd wedi gallu dod â’r argyfwng yn fyw drwy gelf a stori, gan ddychmygu’r hyn sy’n ein disgwyl yn y dyfodol os na fyddwn yn cyflawni’r cynllun hwn. Rwy’n hynod ddiolchgar am hynny a hoffwn ddiolch yn arbennig i bawb a roddodd o’u hamser i ysgrifennu cardiau post atom o’r dyfodol yr oeddent ei eisiau – maent wedi ein hysbrydoli ni â’u gweledigaethau llawn gobaith. Wrth inni droi yn awr at y cyfnod cyflawni, gan droi’r geiriau yn weithredoedd, hyderaf y bydd pawb sy’n darllen y tudalennau hyn yn dod o hyd i obaith ynddynt. Ac os ydych yn gorff statudol â dyletswydd i weithredu o dan Ddeddf yr Amgylchedd, yn breswylydd unigol yn y Parc, neu’n ymwelydd, rwy’n gobeithio y byddwch yn ddigon penderfynol i gymryd pa faint bynnag o gamau sydd eu hangen i ddiogelu Bannau Brycheiniog ar gyfer y cenedlaethau’r dyfodol.
