Nid ydym yn gweithio ar ein pennau ein hunain wrth gyflawni ein cenadaethau.

Rydyn ni’n dibynnu ar gymorth, arbenigedd, cyngor a sgiliau ymarferol gan amrywiaeth o bartneriaid sy’n gweithio gyda ni tuag at yr un nodau.

Drwy gydol y Cynllun hwn, rydyn ni wedi arddangos amrediad o brosiectau sy’n dangos y math o weithredu sydd ei angen ar raddfa fawr os ydym am gyflawni ein gweledigaethau (gweler Sêr y Bannau). Erbyn hyn, hoffem arddangos y partneriaethau yr ydym am weithio gyda nhw i ddatblygu’r camau manwl sydd eu hangen i greu’r newidiadau angenrheidiol. Teimlwn yn freintiedig iawn o gael gweithio gydag ystod ac amrywiaeth mor eang o bartneriaethau, a chredwn ei fod yn dyst i’r ymrwymiad a’r angerdd a deimlir tuag at Fannau Brycheiniog gan gynifer o wahanol bobl a sefydliadau.

Mae rhai o’r partneriaethau hyn (fel ein Partneriaeth Natur Leol er enghraifft) yn canolbwyntio ar bwnc penodol ac yn derbyn ffrydiau ariannu penodol i weithredu. Mae eraill wedi’u grwpio o amgylch ardaloedd gofodol (er enghraifft, Meithrin Mynydd), ac yn mynd i’r afael â’r ehangder o faterion a deimlir yno. Yn y modd hwn, rydyn ni’n gallu dosbarthu awdurdod a dirprwyo penderfyniadau i’r lefel fwyaf lleol posibl, yn unol â’r arferion gorau a ddefnyddir i reoli tirweddau gweithredol byw fel y Parc.

Mae datblygu, cefnogi a gweithio o fewn partneriaethau iach yn un o amcanion allweddol y Cynllun hwn ac yn un o werthoedd hollbwysig ein sefydliad. Ymdrechwn i wneud penderfyniadau ar y cyd lle bynnag y bo modd, gan roi gwerth ar feithrin perthynas fel rhywbeth sy’n greiddiol i lwyddiant, a sicrhau bod pawb sy’n cael eu heffeithio gan benderfyniadau wedi’u cynnwys yn y cydlunio.

Cyflawni’r Cynllun Gyda’n Gilydd

Diffinnir gweithio mewn partneriaeth gan y Cenhedloedd Unedig fel:

“Perthynas gydweithredol barhaus rhwng neu ymhlith sefydliadau o wahanol fathau o randdeiliaid sy’n alinio eu buddiannau â gweledigaeth gyffredin, gan gyfuno eu hadnoddau a’u cymwyseddau cyflenwol a rhannu risg, er mwyn creu’r gwerth mwyaf posibl a sicrhau budd i bob un o’r partneriaid.”

O fewn y tudalennau hyn, rydyn ni’n nodi bod y Partneriaethau canlynol yn arwyddocaol i gyflawni Cenhadaeth y Bannau. Mae pob adran wedi’i datblygu gan y Partneriaethau eu hunain, yn eu geiriau eu hunain, gyda phob partneriaeth yn endid ynddo’i hun.

Nid yw’r rhestr hon yn gyflawn a gobeithiwn y bydd modd inni ei diweddaru yn ystod cwrs y cynllun, wrth i bartneriaethau newydd ffurfio a datblygu. Am y tro, rydyn ni’n ddiolchgar iawn i’r canlynol am eu hymrwymiad i Barc Cenedlaethol Bannau Brycheiniog a gweledigaeth y Cynllun hwn: