Ein Bwyd
Duncan Fisher & Sue Holbrook
Rydyn ni’n bobl leol brofiadol a rhagweithiol yn gweithio gyda’n gilydd trwy Ein Bwyd 1200 sy’ngymdeithas budd cymunedol.
Rydyn ni’n ymateb i argyfwng sy’n bygwth ein hinsawdd, ein natur, ein cyflenwadau bwyd a’n hiechyd. Rydyn ni’n gweithio trwy bartneriaethau, gan gynnwys gyda’r Parc Cenedlaethol a phartneriaid eraill Y Bannau
Ein Bwyd
Er mwyn creu economi fwyd leol a bywiog, mae angen i ni gynyddu’r galw am fwyd lleol – gan drigolion, awdurdodau lleol, a dinasoedd cyfagos. Ar yr un pryd, mae angen inni dyfu mwy o fwyd yn lleol, gan ddefnyddio egwyddorion adfywiol sy’n cloi carbon ac sydd ddim yn niweidio natur â llygredd ffosffad neu nitrad. I wneud hynny, rhaid inni ddod o hyd i dir, denu tyfwyr medrus i drin y tir hwnnw, a chefnogi’r ffermydd bach newydd hyn gyda chyllid, tai, cynllunio, marchnata a thechnoleg.
Ein Nodau
Bydd llwyddiant yn cynnwys wyth eitem: llai o allyriadau carbon yn ein rhanbarth yn deillio o dyfu a bwyta bwyd; cyflenwadau lleol diogel ar gyfer yr adegau pan amharir ar gadwyni bwyd byd-eang; mwy o swyddi lleol; darparu bwyd iach a mwy maethlon; llai o lygredd; diogelu a gwella bioamrywiaeth; cydlyniant cymunedol cryfach mewn perthynas â’r fasnach fwyd; a chymorth i liniaru tlodi bwyd lleol
Ein Gweithredoedd
Rydyn ni’n cynyddu’r galw am ffrwythau a llysiau lleol trwy gynnal ymgyrchoedd marchnata yn y
dref, gweithio gydag awdurdodau lleol i gyflenwi ysgolion, a gweithio gyda rhaglenni bwyd Caerdydd i adeiladu cadwyni cyflenwi yno hefyd. Rydyn ni’n cefnogi datblygiad busnesau garddwriaeth fasnachol sy’n fach ond yn gynhyrchiol iawn, gan ddefnyddio technegau adfywio (cloi carbon, adeiladu bioamrywiaeth y pridd, a dilyn egwyddorion organig) ac yn cyflogi tua 1 person/erw. Rydyn ni’n paru tyfwyr â thirfeddianwyr preifat, yn chwilio am ffermydd i brynu i mewn iddynt, yn hyrwyddo perchnogaeth gymunedol ar gyfer llu o fentrau bwyd bychain, ac yn chwilio am ffermydd sirol at yr un diben. Rydyn ni’n gweithio i gynyddu’r ddarpariaeth ar gyfer hyfforddiant yn y maes garddwriaeth fasnachol ac yn siarad â disgyblion ysgol am yrfa mewn tyfu bwyd yn y dyfodol. Rydyn ni’n helpu ffermwyr newydd i ddatblygu gwerthiant a marchnata ar y cyd, dod o hyd i gyllid dechrau- a-thyfu, dod o hyd i dai, a defnyddio technolegau di-garbon ar gyfer ffermydd bach. Rydyn ni hefyd yn gweithio gydag awdurdodau lleol a Llywodraeth Cymru i ddatblygu rheoliadau a pholisïau cynllunio cefnogol.
Rydyn ni am gyfathrebu â’r cyhoedd lleol ar y cyd ag Awdurdod y Parc Cenedlaethol. Rydyn ni hefyd am weithio gyda’r Awdurdod i greu rheoliadau cynllunio sy’n cefnogi ffermio adfywiol ar raddfa fach
Mae cynllun Y Bannau yn golygu y gallwn weithio mewn partneriaeth â’r Parc Cenedlaethol a’i holl bartneriaid eraill. Fel pawb arall, ni allwn gyflawni ein nodau heb bartneriaethau cryf.
